Author's Note: Summer

April 7, 2009. Super. Init. Parang nasa disyerto na kami. Nakatapat yata yung araw sa Pilipinas. Lagpas body temperature ang init, sabi ng thermometer namin. May pawis na tumutulo sa halos lahat ng parte ng katawan ko, pati dun sa parteng hindi ko pedeng banggitin sa publiko. Palapit na yata ng palapit ang impyerno sa lupa. Nahulog siguro ang earth sa galaxy kung saan puno ng active volcanoes. Mahal na mahal siguro ni Sun si Earth kaya niyayapos nya itong maigi. Pero kahit ano pa man ang dahilan, walang makakapagkait na napaka-init ngayon. Summer yata ang tawag sa panahon na ito.



Isang bagay na ayoko sa pagtira sa Pilipinas e ang sobrang init ng panahon dito. Kahit tag-ulan mainit pa din at wag mo na akong pagsimulain na magsalita tungkol sa tag-init. Ewan ko nga ba, parang butas yata ang ozone layer ng Pilipinas kaya pag nakatapat ang araw sa atin e damang-dama ng bansa natin ang lagablab ng haring araw. Isang bagay na nakakabutas ng ozone layer? Polusyon.

Meron na sigurong pag-aaral na nagsasabi sa kung sobrang laganap ang polusyon sa ating bansa. Pero natatamad akong magresearch sa sarili ko kaya bahala na kayo sa paghusga kung mataas nga ba ang polusyon sa bansa natin. Basta mataas ang polusyon, na nagdudulot ng pagkabutas ng ozone layer at paglala ng init sa bansa natin.

Wala na tayong magagawa kung galit man sa atin ang araw o malakas lang talaga ang apoy sa stove ni Satanas. Hindi na natin mababago kung ano mang panahon meron tayo dito. Ang pwede na lang natin gawin e gumawa ng paraan upang maibsan ang init na nararamdaman natin sa sarili. Isang magandang solusyon, magswimming.

Tradisyon na ng mga tao sa earth ang paglabas sa bahay nila, iwanan ang panonood ng tv, paglilinis ng kuko sa paa, pagluluto ng mamantikang ulam, pakikipagtelebabad, at pakikipagchat sa mga walang kwentang tao sa internet upang pumunta sa isang resort o beach, saan man kaya ng pera nyo. Masaya ang pag-swi-swimming dahil dito mo lang mararamdaman ang ginagawa ng mga isda sa buhay nila. Nakakatulong ito para maibsan ang init, nakakapresko pa, mawawala ang lagkit ng katawan, at malalabanan ang taglay na kasamaan ng heat stroke.

Ganyan ang sinabi kong dahilan sa aking lola, pero hindi ko pa din siya napilit na ituloy ang dapat na outing namin sa beach. Kaya eto ako, naliligo na lang sa aking pawis.

Reenactment
April 2006

Pedro: Ang init!
Mama Mia: Summer ang tawag dyan.
Pedro: Para akong sinusunog!
Mama Mia: Bakit ka kasi nasa arawan?
Pedro: Tumutulo ang pawis ko mula ulo hanggang paa!
Mama Mia: …
Pedro: 37 Degrees yata ang temperatura dito!
Mama Mia: Hindi ka ba titigil?
Pedro: Sobrang init talaga!
Mama Mia: Sige na! Pupunta na tayo sa Baguio!
Pedro: Sa wakas! Akala ko hindi mo ako nagets e.

Isa pang solusyon para maibsan ang init e ang pagpunta sa malalamig na lugar sa Pilipinas. Isang lugar siguro na pumasok agad sa isip mo ang Baguio, ang tinaguriang Summer Capital of the Phillipines. Pero meron naman ding ibang lugar na malamig ang simoy ng hangin, tulad ng mga bulubunduking probinsya at freezer ng ref nyo. Ang Baguio nga lang ang 1st choice ng mga Pilipino para puntahan sa mga panahong napaka-init.

Mga dalawang beses pa lang yata ako nakakapunta sa Baguio at yun e noong bata pa ako, kaya wag niyong asahan na meron akong mga facts na ibabahagi sa inyo. Basta alam ko malamig dun at may mga souvenir na may pagkabastos tulad ng “specially hand-crafted wooden (male reproductive organ)”. Tama ang nabasa mo, (male reproductive organ). Sino man ang nakaisip ng ganon e lubos na ang pagpapasalamat ko sa kanya sa pagtulong niya para mapalago ang mga gawang pinoy.

(Kailangan kong pumuntang Baguio para makabili noon.)

“Hindi.” Yun pa din ang textback sa akin ni lola. Wag ko na daw siyang pilitin at wala na siyang load. Wala din daw kaming pera para makapunta sa Baguio. Ang ganda ganda na ng mga nabanggit kong dahilan pero wala pa din. Kaya eto pa din ako, pinipiga ang tshirt kong basang-basa na sa pawis.

Badtrip. Natalo mo ako ngayon, mainit na panahon. Pero babawi ako sayo. Promise.